مذكرات طالبة طموحــه # 1

اتذكر لما خلصت ثاني ثانوي مع اعز صديقاتي؛
ميشيل ( مشاعل ) ، ام رهومه ( رباب )
إبتدت كل وحده فينا تحدد طريقها وتختار مستقبلها
وانجبر ’’ الثلاثي المرح ’’ على الوداع ..

قررت مشاعل تنتقل لمدارس المجد ؛
وَ رباب انتقلت للحياة الزوجية وسافرت برا الرياض
اما انا فإنتقلت لمدارس الجيل لأن سمعة مدارس المجد ماكانت تعجبني
ومشاكل بناتهم كثير

وإفترقنا وإبتدء الجـَـد والإجتهاد ..

رباب صديقتي واختي الغالية واللي احبها كثير كثير كثير؛
كنت كل يوم انا وياها نتهاوش
يا إني كنت دلوعه ومن العناد مخي مركب شمال!
وهي طيبه وقلبها ابيض فوق الوصف
طبعاً كنا دائماً نتصالح ومشاعل هي الوسيط في كل مره هههههههه
اخر الفصل الثاني كنا متهاوشين واخذت شهادتي بدون اسلم عليها
بنفس اليوم انهبلت لما اتصلت وقالت:
ايمان خلاص انا بتزوج وبسافر برا الرياض
جلست ابكي وماصدقتها ، قلت لها انتي كذابه مليون مره !
وهي تحلف انها صادقه
معقول خلاص ماراح اشوف صديقتي مره ثانيه ياااالله ):
جلسنا نتكلم اكثر من ساعه وتواعدنا مانفترق ابداً
ومهما صار بالدنيا نحافظ على صداقتنا كل العمر
والحمدلله لغاية اليوم وبعد اكثر من 7 سنوات
لازلنا على الوعد والله لايغير علينا الا لكل خير ..

مشاعل .. تخرجت من الثانوي ودخلت كلية تابعة لوزارة التربية والتعليم
ورغم انشغالي انا وهي بدراستنا الا ان تواصلنا من اجمل وَ اروع مايكون
ميشيل طالبه مجتهدة وهادئه لكنها كتله من الوناسه والمرح وسعة الصدر
اذا سولفت معاك غصب تضحك اللي معاها وطيبه كثير بس طيبتها على ذكاء
حالياً معيده بنفس كليتها وتمشي طالباتها وتدفهم درجات وباردة قلبي يالبى قلبها
مره بدون تنسيق وبعد طول غياب ، شاركت في ملتقى خيري ولما حضرت له
كانت المنسقه توصلني للمكان المخصص لي ، وانا بطريقي ..
سمعت صوت حسيته يرن بقلبي
وقفت وجلست اناظر في اللي تتكلم وبيني وبينها مترين او اقل
ناظرت فيني ــ ’’ إيمااان !! ’’ .. ’’ مشاااعل Oo ’’ ؟؟
وسوينا فيلم هندي بـ البطيئ خخخخخ
مشاعل لازالت مثل ماهي تمام بنفس روحها بنفس مرحها
عسى الله يحفظها ولايخليني منها صديقة عمري..

وبقيت انا .. ام النكبات و’’ الحظ المعتر’’على قولة اخوننا السوريين
الترم الاول بثالث ثانوي ابد مصريه دافوره ماافكر غير بدروسي وبطني
الناس ينحفون بثالث من كثر الهم وانا ؟؟
انام اكل اذاكر انام اكل اذاكر اذاكر اذاكر اذاكر وهكذا
معدلي الترم الاول 98,98 يعني 99% واتذكر اخذت بالرياضيات 100%
كان كل من سألني اقوله عادي وعينكم ماتشوف الا النور
الترم الثاني وقت الاختبارات النهائيه استخفيت
امسك الكتاب بذاكر مااشوف شي !! كنت اصيح صياح وانهارت اعصابي
ومع هذا دخلت الاختبارات النهائيه معتمدة على فهمي طول الترم
وتخرجت بـ 92% وياقلب لاتحزن ):
حظي ان كل اللي تخرجوا بنفس السنه سبحان الله كان معدلاتهم عاليه
حتى يقولون هذيك السنه سووا احصائيه للدوافير حول العالم
والسعودية طلعت اعلى شي!

اخذت شهادتي وبكل حماس رحت اقدم على كلية الحاسب بجامعة الملك سعود
قالوا لي ’’ هششش يلا مناااك !! ’’ التسجيل مقفل على 95%
وبعد المحاولات قالوا مافيه الا لغة صينية او تخصص تغذية اختاري
اما صيني وش ابغى فيه Oo
سجلت بالتغذية وسحبت على حلمي الوردي ’’ الحاسب ’’
وسبحان الله عسى ان تكرهوا شيئاً وهو خير لكم ..
وقت ابتدء السمستر دخلت اول محاضرة تدرون من شفت؟
هيون صديقتي بالثانوي ونوفا بنت جيراننا وصديقتي من اولى ابتدائي لثاني ثانوي
وتعرفت على سموره وتوته وكذا بنت الله يذكرهم بالخير
الحمدلله بسرعه كونّت لي قروب فن تاستك ^^

رغم اني ماحبيت تخصص التغذية كثير بس بدعّت خصوصاً بالاحياء الدقيقة
كنت اخذ فل مارك واجاباتي نموذجيه على مستوى الكلاسز
وفعلا كنت احب هالمقرر كثير، اتذكر اول مره دخلنا المعمل
كل طالبه كانت تسوي لها شريحه وتشوفها تحت المجهر
انا سويت شريحة طماطم لانها اسهل شي وحطيتها تحت المجهر عشان افحصها
من قوة الحماس صكّيت عيني بالمجهر وتعورت على خفيف خخخخخخ

وعلى نهاية السمستر صار تقديم بجامعة الامام ، كلية الحاسب
وكل قروبي قررنا نسحب ملفاتنا من جامعة الملك سعود وننتقل لحلمنا الحقيقي

لما رحت اسحب ملفي من سعود كان لازم املئ اوراق اخلاء طرف
من كذا مكان ، كان من بينها المعامل والمكتبة المركزية
هذي كانت الاماكن اللي احس بالمتعه فيها وان الوقت يمّر بدون احس فيه
لما وصلت لمسؤولة المعامل كان داخلي حزين على فراق مكان احبه
قالت لي .. ليش ايمان؟ انتي شاطره وممكن يكون لك مستقبل بهالتخصص
قلت لها عن حلمي اللي نفسي يتحقق وكيف رجعت لي فرصه عشان اوصل له
كلامها اثر فيني وطلعت ودمعتي بطرف عيني وإتجهت للمكتبة
وبطريق رجعتي وانا على الجسر الصغير اللي يربط بين المكتبة وكلية الصيدلة
بكيت من قلب لاني قطعت علاقتي بكل شي ارتبطت فيه بهالجامعة
واستلمت ملفي ومباشرة سجلت بجامعة الامام ، كلية الحاسب

إبتدء السمستر ، وتعرفت على صديقات اكثر ..
خوخه صديقة سموره وبنت جيرانهم ، اريج وَ هيله بنات القصيم
عنبرور المتعصبه والعنيده ( والدفشه بعد خخخخخخ ) ، بسمه المرحه
رباب وَ إعتدال وَ نهى ، سمر وَ سناء ، نوره وَ وفاء صديقاتي بالثانوي
بالاضافة طبعاً لتوته وهيون ونوفا وسموره ..

في البارت الجاي ..
راح اتكلم عن خمس سنوات قضيتها في رحاب كليتي الحبيبة
’’ كلية الحاسب ’’
ترا مو حبيبه .. حبيبه مرره
والله ماحبيتها الا لما استلمت الوثيقة خخخخخ

فوتكوو بعافيااا